У Брэсце прайшоў ІХ адкрыты фальклорны фестываль «Радавод». На два дні ў горад над Бугам прыехалі аднадумцы з усёй вобласці, якія цікавяцца беларускай самабытнай культурай і імкнуцца захоўваць яе. Сярод іх і прадстаўнікі ўстаноў агульнай сярэдняй і дадатковай адукацыі Бярозаўскага раёна. Арганізатарамі фестывалю выступілі ўпраўленне па адукацыі Брэсцкага аблвыканкама і Брэсцкі абласны цэнтр маладзёжнай творчасці.
Фестываль праводзіцца з 2004 года адзін раз на тры гады ў розных населеных пунктах Першага рэгіёна. Свята з’яднала ўсіх неабыякавых да багацця народнай культуры, яе рэгіянальных асаблівасцяў і непаўторнага каларыту Берасцейшчыны. Для правядзення фэсту былі абраны дзве пляцоўкі – парк культуры і адпачынку і мастацкі музей.
Прадстаўнікі ўстаноў агульнай сярэдняй і дадатковай адукацыі Бярозаўскага раёна выступілі ў розных конкурсных выпрабаваннях. У першы дзень навучэнцы аб’яднанняў па інтарэсах Цэнтра дадатковай адукацыі дзяцей і моладзі г. Белаазёрска прымалі ўдзел у конкурсе юных майстроў «Усё ў тваіх руках». Эвяліна Кулініч, якая займаецца ў аб’яднанні «Мастацкая лялька» (кіраўнік – Вольга Буракевіч), прадставіла традыцыйную тэкстыльную цацку – ляльку-мотанку. Мілана Лайтар («ЭкаАртДызайн», кіраўнік – Любоў Крэнь) – традыцыйную цацку з прыроднага матэрыялу – саломы. Абедзве работы ўзнагароджаны дыпломамі ІІ ступені галоўнага ўпраўлення па адукацыі Брэсцкага аблвыканкама. На другі дзень пяць аб’яднанняў па інтарэсах сталі ўдзельнікамі выставы на конкурсе «Фальварак майстроў», дзе былі прадстаўлены работы навучэнцаў, выкананыя на падставе традыцыйных рамёстваў рэгіёна. Гэта ўзорная студыя «Макатка» (кіраўнік – Алена Пратасевіч), «Беларускае ткацтва» (кіраўнік – Таццяна Пунько), «Кераміка» (кіраўнік – Дзіяна Шышкавец), «ЭкаАртДызайн» (кіраўнік – Любоў Крэнь) і «Валянне з воўны» (кіраўнік – Марына Красоўская). Па выніках выставы ЦДАДзіМ узнагароджаны дыпломам І ступені. На гэтай жа пляцоўцы адбыўся конкурс майстар-класаў традыцыйных рамёстваў. Дар’я Красоўская атрымала дыплом І ступені за валянне рукавіц, Аліса Лайтар і Ульяна Пукала – дыплом І ступені за ткацтва на кроснах. Ганна Станкевіч – дыплом І ступені за вышыўку абярэжных матываў на даматканай (саматканай) тканіне, яна праводзіла майстар-клас з настаўнікам – кіраўніком Аленай Пратасевіч.
Прадставілі выставу і правялі майстар-класс па беларускай выцінанке навучэнка абразцовай студыі ІЗА і ДПМ Цэнтра дадатковай адукацыі дзяцей і моладзі г. Бярозы Марыя Арзаева і педагог Наталля Шоўкавая. Марыя ўзнагароджана дыпломам ІІ ступені, а ЦДАДзіМ – ІІ ступені як пераможца фестывалю ў намінацыі «Фальварак майстроў».
Гісторыка-краязнаўчы музей гімназіі г. Белаазёрска (кіраўнік – Галіна Скарына) у конкурсе «Музейны куток» прадставіў выставу «Лён: ад семечка да нітачкі»: побытавыя рэчы, прылады і абсталяванне. На ёй наведвальнікам Сафія Царковіч паведала пра ўсе этапы апрацоўкі лёну, частавала гасцей бульбачкай, якую трэба было абмакнуць у тоўчанае льняное насенне. Арына Мастыка прадоўжыла міні-прэзентацыю – ад ніткі да тканіны. Яна прапаноўвала наведвальнікам самім паспрабаваць зрабіць работу па падрыхтоўцы нітак да ткацтва. З’явілася нямала жадаючых, сярод іх і начальнік галоўнага ўпраўлення па адукацыі Брэсцкага аблвыканкама Наталля Каліноўская. Яна, надзеўшы вытканы фартушок, наматала ніткі на цэўку. Работа вучаніц адзначана дыпломам І ступені ўпраўлення па адукацыі.
Выставы нашых устаноў адукацыі выклікалі цікавасць у гасцей і ўдзельнікаў фестывалю з розных рэгіёнаў Брэсцкай вобласці. Шчыра віншуем пераможцаў!
Жанна МІРОШНІК
Фота з архіва ўстаноў адукацыі
Подписывайтесь на нас в Telegram!